Ataúro, 08 Abril 2024: Komisáriu Ezekutivu Serbisu Korporativu, Eletricidade de Timor-Leste, Empresa Pública (EDTL, E.P), Júlio de Jesus Gonçalves, hala’o enkontru koordenasaun serbisu entre Autoridade Munisípiu Ataúro liga ho produsaun no distribuisaun enerjia elétrika iha Ataúro.

Iha intervensaun Administrador Postu Ataúro, Mateus Belo agradese ba EDTL, E.P tanba serbisu maka’as ho esforsu tomak hasa’e rásiu eletrifikasaun iha postu ne’e, maske nue’e Mateus Belo husu EDTL, E.P atu aumenta oras operasaun mákina produsaun enerjia elétrika nian, nune’e komunidade sira bele asesu enerjia 24/7.

Hatan ba preokupasaun ne’e, Komisáriu Ezekutivu Serbisu Korporativu, Júlio de Jesus Gonçalves hatete, EDTL, E.P tau ona iha planu tinan ne’e atu hadiak Sistema fornesimentu enerjia elétrika iha postu administrativu Ataúro, no sei estende liña eletrisidade ba aldeia sira ne’ebé seidauk asesu enerjia elétrika.

Iha semana ne’e, Ekipa Tékiniku Planeamentu Sistema elétrika EDTL, E.P sei to’o iha Ataúro hodi halo site visit ba aldeia Varuana, Akarema, Arlo, Doro no Iliana, ne’ebé tama ona planu implementasaun projetu eletrifikasaun iha tinan ne’e.

Dadaun ne’e, rásiu eletrifikasaun iha Ataúro atinji ona 80%, produsaun enerjia elétrika iha Ataúro peak load 208 KW kada loron, total distânsia liña media tensaun no baixa tensaun instaladu 41,5 kilómetru sirkuitu, totál klientes hamutuk uma-kain 1336.

Média, EDTL, E.P