Oecusse, 13 Jullu 2026 – Prezidente Komisaun Ezekutiva EDTL, E.P., Dr. Paulo da Silva, akompaña husi Komisáriu Ezekutivu ba Servisu Tékniku, Eng. Roberto Manuel Marçal, hamutuk ho ekipa EDTL RAEOA, hala’o vizita téknika ba fatin sira ne'ebé propoin atu implementa Sistema Solar Photovoltaic (Solar PV) iha Suku Bobometo, Postu Administrativu Oe-Silo, no Área Sikone, Pante Makasar, Rejiaun Administrativa Espesiál Oe-Cusse Ambeno (RAEOA).

Vizita téknika ida-ne'e realiza ho objetivu atu halo avaliasaun inisiál ba kondisaun fatin no rekolla informasaun téknika ne'ebé presiza ba preparasaun implementasaun projetu Sistema Solar PV iha futuru, hodi asegura fornese enerjia elétrika ne'ebé sustentável, estável no bele hatán ba nesesidade komunidade sira iha RAEOA.

Iha atividade ne'e, CE EDTL, E.P. mòs akompaña husi Diretór Departamentu Planeamentu Sistema Elétriku, Eng. Bento Xavier, Xefe Unidade Rekrutamentu EDTL, E.P., no ekipa EDTL RAEOA, sira ne'ebé hamutuk halo observasaun no koordenasaun téknika hodi suporta preparasaun implementasaun projetu refere.